Thursday, January 6, 2011

അവസാനത്തിന്റെ അവസാനം വരെ ഇത് ആണിന്റെ ലോകമാണ്!



ഇറാനിയന്‍ കവിത

അവസാനത്തിന്റെ അവസാനം വരെ ഇത് ആണിന്റെ ലോകമാണ്!

ഷോലെ വോള്‍പി


ഞാനൊരു പെണ്ണാണ്്. വെറും പെണ്ണ്.

എന്നെ നോക്കുന്നതേ പാപം-
അതിനാല്‍ ഞാന്‍ മൂടുപടം അണിയേണ്ടതുണ്ട്.

എന്റെ ശബ്ദം കേള്‍ക്കുന്നതേ പ്രലോഭനമാണ്
അതിനെ നിശബ്ദമാക്കിയേ തീരൂ.

എന്നെ സംബന്ധിച്ച് ചിന്തിക്കുന്നതേ കുറ്റമാണ്
അതിനാല്‍ എന്നെ പഠിക്കാന്‍ വിടരുത്

ഞാനിതെല്ലാം സഹിക്കേണ്ടയാളാണ്
അങ്ങനെ ശാന്തമായി, ഒരു പരാതിയുമുന്നയിക്കാതെ മരിക്കണം

എന്നാല്‍ മാത്രമേ ദൈവത്തിന്റെ കോടതിയില്‍
ഞാന്‍ പ്രവേശിക്കപ്പെടൂ
അവിടെ വെണ്‍ പാളികളില്‍ ഞാന്‍ നഗ്നയായി ഇരിക്കും
ധര്‍മിഷ്ഠരായ പുരുഷന്‍മാര്‍ക്ക് മുന്തിരിച്ചാറുകള്‍ പകരും
അവര്‍ക്കായി സ്വര്‍ണചെരുവങ്ങളില്‍ നിന്ന് വീഞ്ഞ് പകരും
അവര്‍ക്കായി സ്‌നേഹത്തിന്റെ ഗീതികള്‍ മന്ത്രിക്കും!!!


ഷോലെ വോള്‍പിയുടെ 'ദ സ്‌കാര്‍ സലൂണ്‍' എന്ന കവിതാ സമാഹാരത്തില്‍ നിന്ന്.
പരിഭാഷ:ആര്‍.കെ.ബിജുരാജ്


ഷോലെ വോള്‍പി


അമേരിക്കയില്‍ താമസിക്കുന്ന ഇറാന്‍ കവിയും എഴുത്തുകാരിയും വിവര്‍ത്തകയും ആക്റ്റിവിസ്റ്റുമാണ് ഷോലെ വോള്‍പി. ഇറാനില്‍ ജനിച്ചു വളര്‍ന്ന അവര്‍ പതിമൂന്നാം വയസില്‍ നാടുവിട്ടു. കരീബിയയിലും യൂറോപ്പിലുമായി ജിവിച്ച അവര്‍ അമേരിക്കയിലേക്ക് വരുന്നത് റേഡിയോ-ടിവി-സിനിമാ പഠനത്തില്‍ ബിരുദാനന്തര ബിരുദം നേടാനായാണ്. നിരവധി പുരസ്‌കാരങ്ങള്‍ നേടിയിട്ടുളള ഷോലെയുടെ കവിതകള്‍ അന്താരാഷ്ട്ര പ്രശസ്തിയാര്‍ജിച്ചവയാണ്. 'സ്‌കാര്‍ സലൂണ്‍', 'റൂഫ് ടോപ്പ് ഓഫ് ടെഹ്‌റാന്‍' എന്നീ കവിതാസമാഹാരങ്ങളും ഇറാന്‍കവിയായ ഫോറ ഫറൂഖ്‌സാദയുടെ രചനകളുടെ വിവര്‍ത്തന സമാഹാരം 'സിന്നും' പ്രസിദ്ധികരിച്ചിട്ടുണ്ട്. ചിത്രകാരി കൂടിയാണ്.ലോസ് ആഞ്ചലസിലാണ്(കാലിഫോര്‍ണിയ)താമസം. (കൂടുതല്‍ വിവരങ്ങള്‍ക്ക് www.sholehwolpe.com).

1 comment:

  1. ശക്തം,അല്ലാതെന്തുപറയാൻ.

    ReplyDelete